torsdag 16. juli 2015

Vidare, Karen, vidare......!



 
Overskrifta kan nok gjelde både forfattaren av - og hovudpersonen i – boka «Love deg aldri». Hovudpersonen i romanen er Karen, dottera i ein gruvearbeidar-familie i bygda Raudsand i Romsdal. Vi møter henne før fyrste gong da ho er 5 år. Tidsplanet vekslar så mellom oppveksten og ungdomsåra hennar, og tida da ho skal førebu femtiårs-dagen sin. Karen er ei nett og spretten jente med bein i nasen, liten av vekst og «stor i kjeften». Ho har to systre, og veks opp i gruvebygda på 60- og 70-talet – både trygt og nært, og samstundes alltid med redsla for når neste ulukke i gruva rammar.

Forfattaren Kristin Maridal, har nok óg bein i nasen, og er av typen som «går vidare». Eit nakkebrot i ei bilulukke har prega livet hennar, og mange kjenner henne frå TV-serien «Ingen grenser», der ho trassa smertene i fjellheimen.

 
Karen er mykje saman med far sin, ho sit under bordet når dei vaksne diskuterer, og er etterkvart med på møter. Ho og blir politisk og sosialt engasjert, og samfunnsutviklinga i Noreg – klasseskilje, avfolkinga av bygdene, industriutviklinga, blir interessant skildra gjennom denne familien. Dei to eldste systrene tek utdanning i storbyen,
Karen blir etterkvart rådmann i Ålesund.
 
Det er mykje som skjer – jentene lever spennande liv og mykje av både godt og vondt skjer kring dei. Det er samstundes realistisk og «vanleg» - slik det ekte livet er spennande. Eg likar svært godt Karen som person, det er inspirerande å lesa om kva ho vil, alt ho får til, meiningane hennar og alt ho bidrar med i samfunnet, kjærleik, venskap, glede og sorg.

 
 Rødsand gruber (Bilete frå Romsdals museum) 

Kristin Maridal har lova tre bøker om Karen – eg gler meg til neste bok!
 
Anne Kristin Rødal, Os bibliotek "Bjørnsons minde".

1 kommentar:

  1. Det er kanskje verdt å merke seg at dette er fyrste bok i ein planlagt trilogi. God bok!
    B.

    SvarSlett